ВМРО-ДПМНЕ преку соопштение ги отфрли обвинувањата на СДСМ за состојбите во земјоделството, оценувајќи дека резултатите од работењето на актуелната Влада ја демантираат политиката на опозициската партија.
Од владејачката партија преку соопштение обвинија дека СДС „не излегува од криминалната матрица“, посочувајќи дека поранешниот министер за земјоделство Љупчо Николовски ќе остане запаметен по, како што велат, нерешените предмети, институционалниот хаос и неисплатените обврски кон земјоделците.
Според ВМРО-ДПМНЕ, за неполни две години Владата исплатила близу 14 милијарди денари за заостанати и тековни обврски кон земјоделците, ги зголемила субвенциите во сточарството и ги откочила проектите кои со години биле во застој.
Во реакцијата се наведува дека биле зголемени наводнуваните површини, исчистени и реконструирани каналите кои, според нив, биле запоставени седум години, обезбедени средства за инвестиции во шумарството и водостопанството, како и бенефициран стаж за шумската полиција. Дополнително, биле донесени повеќе законски и подзаконски акти поврзани со секторот.
„Економските показатели говорат јасно за успешните политики во земјоделскиот сектор. Додека СДС тоне во безидејност, Владата предводена од ВМРО-ДПМНЕ ќе продолжи да работи за модерно и конкурентно земјоделство“, наведуваат од партијата.
Оттаму додаваат дека земјоделците во актуелната власт гледаат сигурен партнер кој работи во нивен интерес.
