РИК: Гласањето на повеќето избирачки места во Србија минува без инциденти

Претседателот на Републичката изборна комисија (РИК), Владимир Димитријевиќ, изјави дека гласањето на голем број избирачки места во Србија досега се одвива без инциденти и неправилности.

„Единствените помали предизвици, како што кажав и во 8 часот, се поврзани со големиот интерес. Излезноста до 10 часот е висока“, изјави Димитријевиќ на втората редовна прес-конференција на РИК.

— реклама —

Тој наведе дека од отворањето на избирачките места, РИК е во редовна комуникација со локалните изборни комисии, кои, пак, се во контакт со избирачките одбори.

„Единствениот предизвик на почетокот, при отворањето на избирачките места, беше создавањето големи гужви, како и почетокот на работата на избирачките одбори и договорите за работата на избирачките места. Сепак, сите избирачки места сега се отворени“, рече Димитријевиќ.

Тој повторно ги повика членовите на избирачките одбори строго да ги почитуваат законот и упатствата на РИК и да постапуваат исклучиво во согласност со нив.

— реклама —

Димитријевиќ потсети дека на избирачките места мора да се води сметка за изборниот материјал и дека неговото евентуално уништување претставува кривично дело. Кривично дело е и попречувањето на избирачите да го остварат своето право на глас. Тој нагласи дека гласањето е тајно и лично.

На првата прес-конференција на РИК, која доцнела околу 20 минути, Димитријевиќ им посакал на сите гласањето да помине во најдобар ред. Тој истакнал дека тоа зависи и од избирачите и од членовите на избирачките одбори, кои ги повикал да го одржуваат редот и да постапуваат во согласност со законот и упатствата на РИК.

— реклама —

Според него, право на глас до 20 часот имаат 6.451.292 избирачи, кои можат да гласаат на 8.392 избирачки места и да изберат една од 18-те изборни листи.

За изборите се пријавени 16.271 набљудувач од 26 здруженија и 57 странски делегации, институции, изборни организации и дипломатски претставништва. Тоа е два и пол пати повеќе отколку на изборите во 2023 година, кога биле пријавени 5.587 набљудувачи.

Избирачките одбори имаат вкупно 50.352 членови во постојан состав, како и околу 300.000 можни претставници во проширениот состав. Во органите за спроведување на изборите, односно во РИК и локалните изборни комисии, има 6.998 членови во постојан и проширен состав.

Димитријевиќ соопштил и дека се отворени 93 избирачки места во 37 држави во странство. Граѓаните од Косово и Метохија можат да гласаат на 60 избирачки места во Врање, Куршумлија, Рашка и Тутин.

Во казнено-поправните установи се отворени 29 избирачки места.