Родителите на починатите во „Пулс“ за барањето Деко да биде пуштен од притвор: „Пуштете го, ние ќе му пресудиме“

На денешното рочиште од судскиот процес за трагедијата во кабарето „Пулс“ во Кочани беа презентирани обдукциските извештаи од Институтот за судска медицина, криминалистика и медицинска деонтологија, со кои, според Обвинителството, се утврдуваат причините за смртта на загинатите.

Обвинителката Наташа Сарамандова пред судот ги изнесе резултатите од вештачењата, при што документите биле прикажувани и на екран во судницата, а поединечно биле наведувани причините за смрт според секоја обдукција.

— реклама —

Според презентираните наоди, околу 50 лица починале од задушување предизвикано од труење и интоксикација со јаглерод моноксид, при што смртта е квалификувана како насилна. Кај дел од жртвите, според Обвинителството, смртта настапила поради притисок врз градниот кош, додека кај други била констатирана смрт поради недостаток на кислород во околината.

— реклама —

Исто така беше наведено дека неколку од настраданите починале во текот на лекувањето, при што и кај нив е констатирана насилна смрт поврзана со последици од интоксикација или тешки изгореници.

Обвинителството дополнително приложи писмени одговори од Судска медицина, со објаснувања за концентрациите на јаглерод моноксид, механизмите на задушување и можностите за преживување со навремена медицинска интервенција. Беше најавено и сослушување на вешто лице кое треба да одговори на дополнителни прашања од судот и странките.

— реклама —

Одбраната, пак, реагираше дека дел од обдукциските наоди не биле целосно презентирани, тврдејќи дека кај дел од жртвите биле забележани и индикации за вдишување на водороден цијанид.

— реклама —

Во судницата имаше и напнати моменти кога родителите на загинатите реагираа на барањето на одбраната за укинување на притворот на дел од обвинетите, извикувајќи „Срамота“ и „Пуштете го, ние ќе му пресудиме“, по што судот изрече предупредување.

Судењето продолжува со изведување на материјални докази и дополнителни вештачења кои треба да ги појаснат околностите на трагедијата.