Тројца полицајци од Кочани беа прогласени за виновни во случајот „Пулс“. На Кире Богатинов и на Горан Лазаров, Судот им изрече условна казна затвор од една година, а на командирот на ПС Кочани Александар Темелков условна казна од две години. Тоа значи дека обвинетите нема да одат во затвор, доколку не сторат ново кривично дело во период од четири години.
Од здружението 16 март реагираа во врска со пресудата. Според нив ова е минимизирање на одговорностаи јасен сигнал дека системот се штити сам себе наместо како што велат да се соочи со сопствените пропусти. За нив ова не е правда туку формалност.
„За злоупотреба на службена должност, законот предвидува до 10 години затвор, а денес имаме условни казни – и тоа за утврдена злоупотреба во систем што со години дозволувал незаконитости, чие непостапување создало услови за трагедија со 63 изгубени животи и над 200 повредени.
Закон vs реалност:
Законот предвидува затвор (6 месеци до 3 години, до 5 години, или најмалку 3 години – во пракса до 10 години), а во конкретниот случај, и покрај утврдената вина, изречена е условна казна, без ефективен затвор.
Овој драстичен несразмер меѓу вина и последици не е случаен – тоа е минимизирање на одговорноста и јасен сигнал дека системот се штити сам себе, наместо да се соочи со сопствените пропусти.
Ова не е правда. Ова е формалност.
Очекуваме повисоките судови да ја преиспитаат пресудата и да обезбедат одговорност што ќе биде во согласност со тежината на последиците.
Нема да молчиме и нема да прифатиме ваква „правда“.
Бараме одговорност без компромис – за сите што со своето постапување или непостапување придонеле до вакви последици.
Без тоа – правдата останува само збор“, стои во објавата.
Условни казни за полицајците од „Пулс“ кои пишувале прекршоци на непостоечка фирма
Тројца полицајци добија условни затворски казни во предметот поврзан со дискотеката „Пулс“, откако судот утврди дека во службеното работење постапувале неправилно при евидентирање на прекршоци. Судијката Лидија Петровска при изрекувањето на пресудата оцени дека обвинетите се виновни.Кире Богатинов и Горан Лазаров се осудени на условна казна затвор од по една година, која нема да се изврши доколку во рок од три години не сторат ново кривично дело. Александар Темелков доби условна казна од две години затвор, со период на проверка од четири години.Ниту обвинетите, ниту нивните бранители не присуствуваа на изрекувањето на пресудата. Во судницата беа присутни само судијката, обвинителката Спасенка Андонова, новинари и сниматели.Судот утврди дека полицајците во периодот од октомври 2023 до февруари 2024 година при контроли на угостителски објекти составувале записници со неточни податоци за фирмите, при што прекршоците ги воделе на друго правно лице, наместо на вистинскиот сопственик на објектот „Пулс“.Според образложението, тие не постапиле само формално, туку пропустите биле суштински, бидејќи не бил точно утврден носителот на дејноста, што е клучен елемент при ваквите постапки. Судијката нагласи дека службените должности биле извршувани само наизглед, без суштинска проверка и контрола.По доставувањето на писмената пресуда, обвинетите имаат право на жалба пред Апелацискиот суд, а задолжени се и за плаќање судски паушал од по седум илјади денари.Ова е прва неправосилна пресуда поврзана со случајот „Пулс“, кој произлегува од поширока истрага за работењето на објектот и постапувањето на полициски службеници. Во останатите предмети за овој случај се водат одделни постапки против повеќе обвинети.Во најобемниот предмет, кој се однесува на трагедијата во која животот го загубија 63 лица, а над 200 беа повредени, постапката сè уште е во тек и трае изведувањето на доказите.
Македонија | пред 4 часа
