Со силни емоции и незадоволство од текот на судската постапка, родителите на загинатите во пожарот во дискотеката „Пулс“ денеска демонстративно ја напуштија судницата во Казнено-поправната установа „Идризово“.
Причина за нивниот револт беше барањето на одбраната за изземање на јавната обвинителка Наташа Сарамандова, потег што семејствата го оценија како дополнително одолговлекување на постапката.
Според родителите, ваквите барања го оддалечуваат судскиот процес од суштинските прашања поврзани со утврдувањето на одговорноста за трагедијата, во која животот го загубија десетици млади луѓе.
Александар Наунов, татко на Надица Наунова, која загина во пожарот, изјави дека се создава впечаток оти вниманието, наместо кон доказите и нивната содржина, се пренасочува кон процедурални прашања.
„Единствено што бараме е доказите да се изведат до крај и одговорноста да не се изгуби меѓу процедурите“, порача Наунов.
Незадоволство изразија и други родители на загинатите. Јулија Златкова, мајка на Томас Златков, истакна дека обвинителката Наташа Сарамандова и обвинителот Дарко се нивната надеж дека вистината за трагедијата ќе биде целосно расветлена.
Таа оцени дека евентуалното изземање на Сарамандова би можело да ја наруши довербата на семејствата во процесот и изрази уверување дека државниот јавен обвинител Ненад Савески нема да го прифати барањето.
На денешното рочиште адвокатите на обвинетите побараа изземање на обвинителката Сарамандова, тврдејќи дека при презентирањето на доказите постапувала пристрасно и изоставувала делови што, според нив, се од суштинско значење за одбраната.
За ова барање треба да одлучи државниот јавен обвинител Ненад Савески, додека рочиштето продолжи со изведување материјални докази од страна на друг јавен обвинител.
