Гнев и разочараност кај родителите на загинатите во трагедијата „Пулс“ по одлуката на судот да изрече условни казни за тројца полициски службеници од Кочани. Тие велат дека со вакви пресуди довербата во правосудниот систем не само што не се враќа, туку дополнително се урива.
„Ако довербата во судството е 2% со вакви пресуди, веќе зборуваме за минус, односно формално постоење на институција суд. И тоа не е сарказам, тоа е реалност. И тамам кога ќе помислиш дека не може полошо, се менуваат обвинители во последен момент, се прераспределуваат предмети, се разводнува одговорност, се по книга, само не по правда. Ако сега јавното обвинителство молчи, нема потреба ништо повеќе да се објаснува, ќе биде јасно и без зборови. А судијката нека си одговори сама, дали законите се пишуваат за да важат или да се заобиколуваат. И дали навистина може мирно да спие кога зад една ваква пресуда стојат 63 животи и над 200 повредени“, порача родител на загинато дете во име на здружението „16 март“.
Со критики се огласи и Александар Наунов, кој смета дека има сериозни нелогичности во случајот.
„Кочани е со 15 улици, не може обвинетите да се жалат дека и да дел деко погрешни документи, тековна или лиценца, кога таму стојат дека е на Димитар Влахов лиценцата и тековната, а они се самите инспектори, биле на Крижевска улица, значи тоа е намерно така кажано и треба обвинителството да постапи со жалба и судот да види реалната ситуација, бидејќи се гледа дека нешто се крие ќе дознаеме“, изјави Наунов.
Претходно, судот им изрече условни казни на тројцата полицајци – Кире Богатинов, Горан Лазаров и Александар Темелков – кои беа обвинети дека при контроли во дискотеката „Пулс“ прекршочните пријави ги воделе на друга, неактивна фирма.
Судијката Лидија Петровска ја образложи пресудата пред новинарите, посочувајќи дека нивните дејствија не предизвикале директни последици поврзани со пожарот.
Според судот, двајцата инспектори добиле по една година условна казна, додека командирот на полициската станица Кочани е осуден на две години условно, поради злоупотреба на службената положба и овластување.
Обвинителството засега не се изјасни дали ќе поднесе жалба на пресудата.
Ова е првата судска разрешница за предмет поврзан со катастрофалниот пожар во дискотеката „Пулс“, во кој загинаа 63 лица, а повеќе од 200 беа повредени. Во меѓувреме, се водат уште два предмети – едниот против девет лица за злоупотреба на службената положба, а другиот против 13 лица за директна инволвираност во трагедијата.
