Амбасадорот на Европската Унија, Михалис Рокас, повика на поголемо политичко обединување во Северна Македонија со цел земјата да ги заврши потребните чекори за започнување на преговорите за членство во ЕУ.
На конференција по повод 30 години од воспоставувањето дипломатски односи и 25 години од Договорот за стабилизација и асоцијација, Рокас истакна дека Европската Унија останува најважен економски и политички партнер на земјата, обезбедувајќи поддршка преку инвестиции, програми и фондови.
Тој нагласи дека предизвиците со кои се соочува државата не се само технички, туку и политички и бараат поголема решителност и меѓупартиска соработка.
Од друга страна, заменик-премиерот за европски прашања, Беким Сали, порача дека европската интеграција останува стратешки приоритет, додавајќи дека реформите веќе даваат резултати во области како владеење на правото и економијата. Тој истакна дека амбицијата на земјата е полноправно членство во ЕУ и дека државата припаѓа на европското семејство.
Рокас оцени дека, иако имало разочарувања низ годините, земјата е поблиску до ЕУ отколку што изгледа, но недостасуваат прагматизам, решителност и политичко обединување за да се донесат клучните одлуки за следните чекори во процесот.
