Евроамбасадорот во земјава, Михалис Рокас, изрази загриженост по посетата на струшката депонија, оценувајќи ја состојбата како сериозен еколошки проблем кој бара итно решение.
При денешната посета, Рокас посочи дека особено загрижува фактот што депонијата се наоѓа во непосредна близина на градот, на брегот на Охридското Езеро и во близина на водоснабдителниот систем, што претставува потенцијален ризик за животната средина и здравјето на граѓаните. Тој најави дека е неопходно што поскоро да се најде трајно решение за проблемот.
Од друга страна, градоначалникот на Струга, Рамиз Ќура, увери дека депонијата ќе биде редовно одржувана, особено во текот на летната туристичка сезона, кога во минатото често доаѓаше до пожари кои дополнително го загадуваа воздухот во градот.
Според последните мерења, направени во 2021 година, депонијата тогаш имала висина од околу 22 метри, додека денес таа надминува 30 метри. Тоа значи дека во последните пет години пораснала за речиси десет метри, што дополнително ја нагласува сериозноста на проблемот.
Струшката депонија со години е еден од најголемите еколошки проблеми во регионот. Еколошките активисти континуирано бараат нејзина целосна дислокација, ревитализација на земјиштето, пошумување на просторот и пренасочување на отпадот кон регионалната депонија која е планирано да се гради во Новаци.
Според нив, само со трајно затворање и санација на постојната депонија може да се спречи понатамошното загадување и да се заштити животната средина во Струга и околината.
