Романија бара помош од сојузниците по нападите со дронови врз бродови во Црното Море

Три комерцијални брода биле погодени од дронови во Црното Море, во близина на романскиот канал Сулина, поради што романските одбранбени сили двапати подигнале борбени авиони.

Романскиот премиер Лука Никулеску изјави дека нападите се случиле во текот на ноќта и ги оцени како неприфатливи, посочувајќи дека претставуваат кршење на меѓународното право и ја одразуваат влошената безбедносна состојба предизвикана од руската војна против Украина.

— реклама —

Министерот за одбрана Штефан-Раду Опреа соопшти дека нема жртви и дека екипажите успеале да ги изгаснат пожарите предизвикани од нападите. Погодени биле танкерот за нафта и хемикалии „Евиа петрол V“, кој пловел под грчко знаме, како и бродовите „Марсол“ и „Али Наџафов“, кои пловеле под знамето на Сент Китс и Невис.

— реклама —

Според Опреа, „Евиа петрол V“ и „Марсол“ биле погодени на четири, односно пет наутички милји југоисточно од каналот Сулина, во романските територијални води.

Тој потсети и на нападот врз товарниот брод „Лариса 1“, кој пловел под знамето на Палау. Бродот бил погоден пред два дена, додека се движел кон пристаништето Сулина, од каде требало да продолжи кон Украина. И во овој случај немало човечки жртви.

— реклама —

Романскиот министер за одбрана ги повика сојузниците да покажат солидарност со Романија преку испраќање извидувачки авиони и опрема за борба против беспилотни летала. Засега, Франција привремено распореди поморски патролни авиони „Атлантик 2“ во Романија.

— реклама —

Каналот Сулина е важна романска пловна рута што го поврзува Дунав со Црното Море и се користи од Украина за извоз. Во октомври и ноември повеќе бродови биле закотвени во негова близина или пловеле кон него и од него.

Руската страна негираше дека користела дронови за напади врз соседите на Украина.