Три брода во пламен по напад со дронови во близина на Романија

Три трговски брода биле погодени од беспилотни летала во Црното Море, во близина на романскиот канал Сулина, недалеку од утоката на Дунав. По нападите на пловилата избувнале пожари, а романските воздухопловни сили двапати ги подигнале борбените авиони Ф-16, објави „Ројтерс“.

Романскиот премиер Лука Никулеску ги осуди нападите, оценувајќи дека тие ја покажуваат влошената безбедносна состојба во Црното Море како последица на војната во Украина. Тој порача дека Романија, заедно со сојузниците во НАТО, ќе ги преземе сите неопходни мерки за заштита на својот воздушен простор.

— реклама —

„Овие инциденти се неприфатливи и претставуваат кршење на меѓународното право“, наведе Никулеску во објава на платформата Икс.

— реклама —

Министерот за одбрана Штефан Раду Опреа соопшти дека трите комерцијални брода биле погодени во период пократок од еден час. Екипажите успеале да ги изгаснат пожарите, а според досегашните информации, нема повредени.

Романската крајбрежна стража и другите надлежни институции биле во постојан контакт со екипажите за да интервенираат доколку има потреба.

— реклама —

Опреа потврди дека борбените авиони Ф-16 извршиле мисии по нападите и најави дека ќе побара поддршка од сојузниците во НАТО за засилување на воздушниот надзор и обезбедување опрема за одбрана од беспилотни летала.

— реклама —

Безбедносната состојба во Црното Море ќе биде една од темите на претстојниот состанок на министрите за одбрана на НАТО, закажан за вторник и среда во Брисел.

Романија, која граничи со Украина и излегува на Црното Море, во повеќе наврати предупредувала на безбедносните ризици од руско-украинскиот конфликт, особено по инцидентите со беспилотни летала во близина на нејзината територија.