Рубио: „Иранскиот предлог е неприфатлив“

Американскиот државен секретар Марко Рубио денес изјави дека предлогот на Иран за повторно отворање на Ормускиот теснец под строги услови не е прифатлив за САД ниту за другите земји.

„Она што тие го подразбираат под отворање на теснецот е тој да биде отворен за пловидба, сè додека преминот низ него се координира со Иран и се добие нивна дозвола, или ќе ве дигнат во воздух и ќе ви наплатат“, наведе американскиот функционер и повтори дека САД нема да толерираат обиди меѓународните пловни патишта да се држат како „заложници“.

— реклама —

Според зборовите на Рубио, тоа не претставува отворање на Ормускиот теснец, кој инаку е меѓународни води.

Тој изјави во интервју за „Фокс њуз“ дека Иран не може да воспостави систем според кој тие би одлучувале кој ќе го користи теснецот.

— реклама —

Рубио истакна дека Иран е „сериозен“ во врска со постигнување договор со САД, но додаде дека секој договор мора да вклучува спречување на Иран да развие нуклеарно оружје.

„Мислам дека се сериозни во врска со извлекување од нередот во кој се наоѓаат“, изјави тој.

Тој оцени дека во Иран економската состојба се влошила од почетокот на конфликтот, вклучувајќи инфлација, проблеми со исплата на плати и санкции.

— реклама —

„Сите проблеми што Иран ги имаше пред почетокот на овој конфликт сè уште постојат, а повеќето се уште полоши“, рече Рубио.

Иран претходно доставил нов предлог до САД за повторно отворање на Ормускиот теснец и завршување на конфликтот, додека нуклеарните преговори се одложени за подоцнежна фаза, пренесе „Аксios“, повикувајќи се на американски функционер и два извора запознаени со ситуацијата.

Новиот предлог бил пренесен преку посредници од Пакистан и се фокусира прво на решавање на кризата околу теснецот и американската блокада.

Како дел од тоа, прекинот на огнот би се продолжил на подолг период или би се постигнал договор за трајно завршување на конфликтот.