Русија бара НАТО да се врати на границите од 1997 година

Руските власти повторно бараат НАТО да ги повлече војниците и воените бази на позициите од 1997 година, пред проширувањето на Алијансата кон Источна Европа. Истото барање Москва го постави во декември 2021 година, два месеца пред инвазијата врз Украина, а сега повторно го вклучила во условите за завршување на војната.

Според документ од 10 ноември, до кој дошол „Њујорк тајмс“, руските претставници ги изнеле барањата за нов европски безбедносен поредок за време на разговорите со американските пратеници во Абу Даби. Автентичноста на документот ја потврдило и друго лице запознаено со преговорите.

— реклама —

Повлекувањето на НАТО до границите од 1997 година би значело намалување на военото присуство на Алијансата во Полска и балтичките држави – Естонија, Латвија и Литванија.

— реклама —

Москва бара и обврска дека НАТО нема дополнително да се проширува, како и прекин на сите воени активности во Украина и во други делови на Источна Европа, Јужен Кавказ и Централна Азија. Меѓу условите се и запирање на испораките на западно оружје за Украина, ограничување на нејзиното учество во заедничката одбранбена политика на ЕУ доколку стане членка на Унијата, како и обврска Велика Британија и Франција да не го користат своето нуклеарно оружје за заштита на други европски држави.

Според „Њујорк тајмс“, руските барања покажуваат дека претседателот Владимир Путин речиси и да не отстапил од позициите што ги имаше пред почетокот на инвазијата. Руските претставници како модел за повоеното уредување на Европа го посочиле периодот на Студената војна и поделбата на континентот на американска и советска сфера на влијание.

— реклама —

Американските пратеници Џаред Кушнер и Стив Виткоф ја повикале руската страна да се насочи кон иднината и да разгледа конкретни чекори за намалување на тензиите. Сепак, по разговорите во Москва, Путин повторил дека предлогот од 2021 година и натаму ја претставува руската визија за европската безбедност.

— реклама —

Барањата предизвикаа реакции во Европа. Полскиот премиер Доналд Туск предупреди дека нивното прифаќање би претставувало директна закана за безбедноста на Полска и другите европски држави. Луксембуршкиот премиер Лук Фриден, пак, порача дека за иднината на Европа не може да се преговара без учество на европските земји.

„Не можете да разговарате за иднината на Европа без нас“, изјави Фриден.