Русија го одби предлогот за примирје во Црното Море: „Нема основа за половични решенија“

Москва ја отфрли идејата за воведување примирје во Црното Море, оценувајќи дека таков договор би претставувал само привремено и половично решение што би ѝ овозможило на Украина да добие време за предах.

— реклама —

Руското Министерство за надворешни работи воедно ја обвини Украина за напади врз бродови во Црното Море, во период кога двете страни ги засилија воените активности во регионот. Зголемените тензии веќе влијаат и врз цените на житото.

— реклама —

Портпаролката на руското Министерство за надворешни работи, Марија Захарова, ги опиша нападите врз бродовите како „дрски терористички напади“ и оцени дека станува збор за намерна политика насочена кон дестабилизација на пловидбата во Црното Море.

„Не гледаме дека ситуацијата се подобрува и затоа нема основа за половични решенија што на режимот во Киев само би му дале време за предах“, порача Захарова.

— реклама —

Нејзината изјава следува по информациите дека Турција предложила воведување мораториум на воените операции во Црното Море како мерка за намалување на тензиите меѓу Москва и Киев.

Захарова, сепак, нагласи дека Русија не добила официјален предлог од Турција. Таа појасни дека нејзината реакција се однесува на изјавата на турскиот министер за надворешни работи, Хакан Фидан, кој претходно соопштил дека Анкара на Москва и Киев им предложила прекин на операциите во Црното Море.