Русија воведе привремена забрана за извоз на авионско гориво до 30 ноември со цел да обезбеди доволни резерви и стабилност на домашниот пазар, соопшти руската влада.
Според одлуката, забраната се однесува и на авионското гориво купено преку стоковни берзи, а мерката ќе остане во сила до крајот на ноември.
„Целта е да се обезбеди стабилност на домашниот пазар на горива“, наведуваат руските власти.
Сепак, предвидени се и одредени исклучоци. Забраната нема да важи за пратки што веќе биле во царинска постапка пред стапувањето на мерката во сила, како и за испораки што се реализираат врз основа на меѓудржавни договори.
Ова не е прв ваков потег на Москва. Во април годинава руската влада го забрани и извозот на бензин од домашните производители до крајот на јули, со образложение дека е потребна стабилизација на домашниот пазар во период на зголемена сезонска побарувачка и земјоделски активности.
Од Кремљ посочуваат дека продолжуваат со мерки за обезбедување сигурно и непречено снабдување на домашниот пазар со горива, особено во услови на нестабилност на светските енергетски пазари и геополитички тензии на Блискиот Исток.
