Русија изврши ракетен напад врз Киев во раните утрински часови, при што најмалку 10 лица се повредени, меѓу нив и едно дете. Во украинската престолнина одекнале најмалку пет силни експлозии, непосредно пред да бидат активирани сирените за воздушна опасност.
Експлозиите биле регистрирани околу 3:38 часот по локално време, по што властите издале предупредување за воздушен напад за Киев и околниот регион.
„Непријателот ја напаѓа престолнината со ракети. Ве молиме останете на безбедни места“, објави на Телеграм началникот на Воената администрација на Киев, Тимур Ткаченко.
Подоцна и украинските воздухопловни сили потврдија дека над градот постои активна ракетна закана.
Според првичните информации од украинските канали за следење на нападите, Русија најверојатно употребила балистички ракети „Искандер-М“ или ракети од системите С-300 и С-400, истрелани од руската Брјанска област. Украинските власти засега не го потврдија типот на употребените ракети.
Државната служба за вонредни состојби на Украина соопшти дека погодени се реоните Соломјански, Дарницки и Днипровски.
Во Соломјанскиот реон избувнал пожар откако била погодена трикатна зграда што се користела како деловен и магацински простор. Пожарот подоцна бил локализиран.
Во Дарницкиот реон пожар избувнал во електроенергетски објект за управување со семафори, а експлозијата искршила прозорци на околните станбени згради.
Во Днипровскиот реон ракетен удар предизвикал пожар во магацин, каде што интервенирале пожарникари и екипи на итната медицинска помош.
Украинските власти соопштија дека во нападот се повредени најмалку 10 лица, меѓу кои и едно дете. Засега нема информации за загинати.
