Русија соопшти дека ја засилува безбедноста на бродовите во Азовско-црноморскиот басен и паралелно работи на воспоставување алтернативни транспортни рути, по неодамнешната ескалација на нападите на море во војната со Украина.
Руското Министерство за транспорт информира дека е формирана посебна работна група, која ќе бара нови логистички решенија и ќе го пренасочува товарниот сообраќај кон други видови транспорт. Како причина за ваквиот потег се наведуваат зачестените напади со беспилотни летала врз бродови во Азовското Море.
Од Министерството додаваат дека повеќе компании кои управуваат со товарни терминали веќе изразиле подготвеност да примат дополнителни количини стока и да го забрзаат нејзиниот транспорт, во рамките на своите капацитети.
Во координација со руското Министерство за одбрана се спроведуваат и дополнителни мерки за заштита на пловидбата и на трговските бродови во Азовско-црноморскиот регион.
Во меѓувреме, нападите меѓу Русија и Украина врз пристаништа, товарни бродови и инфраструктура за извоз на жито во Црното Море продолжуваат да предизвикуваат загриженост на светските пазари.
Руското здружение на извозници на жито предупреди дека украинските напади врз руските пристаништа и бродови би можеле привремено да го прекинат извозот преку Црното Море, што би довело до дополнителен раст на цените на пченицата и би можело да предизвика недостиг на храна во делови од Африка и Блискиот Исток.
Од украинскиот Земјоделски сојуз, пак, предупредија дека руските напади врз бродови во близина на Одеса го ограничуваат украинскиот извоз во екот на жетвата и можат да имаат негативно влијание врз глобалното снабдување со храна.
