Русија нападна парк во близина на училиште во Украина: Загинаа 13-годишно девојче и жена

Тринаесетгодишно девојче и една жена загинаа во руски напад врз општината Козјатин, во украинската област Виница. Во нападот биле повредени уште четири лица, меѓу кои три деца, соопштија локалните власти и службите за итни случаи.

— реклама —

Според началничката на Воената управа на областа Виница, Наталија Заболотна, ударот погодил парк меѓу студентски дом и образовна установа. Од Државната служба за вонредни состојби потврдиле дека руски дрон погодил дом на стручно училиште. По ударот се запалиле два автомобила, а пожарникарите го изгаснале пожарот.

— реклама —

— реклама —

Во болница биле примени две петгодишни девојчиња и 16-годишно момче, кои се здобиле со повреди со средна тежина. Медицинска помош добил и 24-годишен маж со полесни повреди.

Заболотна потврдила дека во нападот загинале две лица – 13-годишно девојче и жена, која починала на одделението за интензивна нега во болница. Со ова таа ја исправила првичната информација дека на местото на нападот загинал маж.