Руски дронови погодиле складишта и објекти во американска сопственост во Украина, меѓу кои и капацитети на земјоделскиот гигант „Каргил“, објави „Њујорк тајмс“.
Според весникот, нападите врз американски компании траат од минатото лето, а меѓу погодените биле и објекти поврзани со „Кока-Кола“, „Боинг“, „Монделиз“ и „Филип Морис“.
На снимка од напад од средината на април, која ја обезбедил и верификувал „Њујорк тајмс“, се гледа како руски дронови еден по друг удираат во голем житен терминал во јужна Украина во сопственост на „Каргил“.
„Ова е лудило“, повторувал возач на камион кој го снимил нападот.
Весникот наведува дека компаниите главно избегнувале јавно да зборуваат за нападите за да не ги вознемират инвеститорите и осигурителните компании.
Мотивите на Русија не се целосно јасни, но дел од украинските бизнисмени сметаат дека станува збор за поширока кампања за слабеење на економијата, додека други веруваат дека целта е одвраќање на американските инвестиции во Украина.
Според „Њујорк тајмс“, американските компании тивко изразиле загриженост кај американските власти поради, како што велат, сè посилната кампања против американските деловни интереси во Украина.
Сепак, администрацијата на американскиот претседател Доналд Трамп не осудила ниту еден од нападите што Украина јавно ги објавила оваа година.
Истовремено, Вашингтон побарал од Киев да се воздржи од напади врз руски нафтен терминал на Црното Море преку кој се извезува нафта од казахстански полиња во кои американски компании имаат удели.
Ова, според извештајот, предизвикало критики за двојни стандарди во американската политика кон војната.
Во февруари претставници на неколку американски компании, меѓу кои „Кока-Кола“, „Каргил“ и „Банџ“, разговарале со група американски сенатори кои ја посетиле Украина.
„Слушајќи ги, рекоа дека веруваат оти намерно се гаѓани“, изјавила сенаторката Џин Шахин.
Според Американската стопанска комора во Украина, Русија се надева дека со нападите ќе го спречи доаѓањето на американскиот бизнис во земјата.
„Кока-Кола“ била една од најсимболичните цели. Кон крајот на минатата година руски дрон погодил фабрика на компанијата, а неколку месеци подоцна украинската одбрана соборила уште еден дрон што се приближувал кон истиот погон.
Градоначалникот на Велика Димерка изјавил дека нема сомнеж оти „целта била токму ‘Кока-Кола’“.
