Шокантни обвинувања пристигнуваат од Москва, откако рускиот министер за одбрана Андреј Белоусов изјави дека „одредени сили“ во Лондон и Париз планирале пренос на елементи од нуклеарно оружје во Украина.
Тој оцени дека ваквиот потег би значел „преминување на сите замисливи граници“.
„Деградацијата на ситуацијата во поглед на стратешката стабилност продолжува да се поттикнува со деструктивните дејствија на западните нуклеарни сили“, изјави Белоусов за време на обраќање на конференција за неширење на нуклеарното оружје, пренесуваат руските медиуми.
Според него, Соединетите Американски Држави категорично ја одбиле иницијативата на Русија за зачувување на наследството од Новиот СТАРТ договор преку доброволно воздржување.
„Руската Федерација е посветена на духот на договорот, целосно ги исполнува своите обврски и се залага за негово понатамошно зајакнување“, истакна тој, говорејќи за обврските во рамки на договорот за неширење на нуклеарното оружје.
Белоусов додаде дека актуелната состојба на меѓународниот режим во оваа област предизвикува загриженост, но нагласи дека Русија останува отворена за дијалог со цел стабилизирање на ситуацијата.
