Руската државна компанија за нуклеарна енергија „Росатом“ соопшти дека украински дрон ја погодил нуклеарната централа Запорожје, која се наоѓа под руска контрола и важи за најголемата нуклеарна електрана во Европа.
Според соопштението, дронот удрил во ѕидот на машинската сала на шестиот енергетски блок, по што дошло до експлозија. Притоа била направена дупка во ѕидот, но не е предизвикана штета на клучната опрема на централата.
Првиот човек на „Росатом“, Алексеј Лихачов, изјави дека станува збор за намерен напад и предупреди дека ваквите инциденти го зголемуваат ризикот од сериозни последици.
„Еден чекор сме поблиску до инцидент што би можел да влијае и врз луѓе кои живеат далеку надвор од границите на Русија и Украина“, порача Лихачов.
Нуклеарната централа Запорожје беше заземена од руските сили во март 2022 година и се наоѓа во близина на линијата на фронтот во југоисточниот дел на Украина. Од почетокот на војната, објектот повеќепати беше предмет на меѓусебни обвинувања меѓу Москва и Киев за гранатирање и напади, што постојано предизвикува загриженост за можен нуклеарен инцидент.
