Русија официјално се повлече од Европската конвенција за спречување тортура

Русија официјално се повлече од Европската конвенција за спречување тортура, со што престана можноста за независен надзор над условите во руските затвори, соопшти Советот на Европа.

— реклама —

Повлекувањето стапи во сила откако Москва минатата година најави дека сака да ја напушти конвенцијата. Со тоа, надлежниот комитет повеќе нема да може да врши проверки во руските затвори и притворските установи.

Русија беше потписничка на конвенцијата од крајот на 1990-тите, но организациите за човекови права со години предупредуваа на распространета тортура и понижувачко постапување во полициските станици и притворските центри. Речиси сите украински воени заробеници ослободени во размените пријавиле дека биле изложени на тортура во Русија.

— реклама —

Во периодот од 1998 до 2021 година, комитетот реализирал 30 посети и проверил 450 места за задржување лица. Сепак, Русија речиси никогаш не дозволувала објавување на извештаите по посетите. Објавени биле извештаи само за четири проверки.

— реклама —

По почетокот на руската војна против Украина, комитетот веќе не добивал дозвола за посети. Телото соопшти дека примило и повеќе извештаи за тортура и малтретирање во Русија, како и на териториите на Украина под руска окупација.

Европската конвенција за спречување тортура, усвоена кон крајот на 1980-тите, е дел од договорната рамка на Советот на Европа, меѓувладина организација посветена на човековите права. Русија беше исклучена од Советот на Европа во 2022 година, поради војната во Украина.

— реклама —

Москва го оправда повлекувањето со образложение дека повеќе не може да учествува во работата на Комитетот за спречување тортура.