Руските власти планираат до 2045 година да преселат околу 114.000 граѓани на окупираните делови од Украина, покажуваат таканаречените „развојни планови“ за Донецк, Луганск, Запорожје и Херсон. Плановите се изработени од руската државна развојна корпорација VEB.RF и Единствен Институт за просторен развој.
За таа цел, Русија развила 15 главни мастер-планови и 10 проекти за просторен развој. Според нив, населението би требало да се зголеми за 67.100 луѓе со реализација на мастер-плановите и дополнителни 46.700 преку проектите за урбанизирање. Се предвидува изградба на над 13 милиони квадратни метри нови станбени објекти, повеќе од 140 градинки, десетици училишта и околу 100 амбуланти и поликлиники. Плановите предвидуваат и изградба или реконструкција на над 3.270 километри патишта, речиси 430 километри железнички пруги со 19 станици, како и развој на марици за јахти и пристаништа, плус обновување на четири аеродроми.
Во индустрискиот сектор се планирани 25 индустриски паркови, осум фабрики за машиноградба, 15 фабрики за градежни материјали и шест рударски и прерадбени погони.
Русија исто така планира развој на туризмот на окупираните територии, со цел до 2044 година да привлече до 9,4 милиони туристи. Како потенцијално атрактивни дестинации се наведуваат Приморск и Геническ, а дополнително и Арабатска превлака, Мариупол, Кириловка, Скадовск и крајбрежјето на Запорожската област.
Анализата проценува дека за реализација на сите проекти ќе бидат потребни околу 225.400 вработени.
