Руските сили во текот на ноќта извршија нов воздушен напад врз украинскиот град Суми, при што со пет наведувани авионски бомби беа погодени објекти од цивилната инфраструктура, соопшти началникот на Воената управа на Сумската област, Олег Хрихоров.
Според неговите информации, регистрирани се пет удари, од кои два во самиот центар на градот. Тој наведе дека од претходниот напад врз околината на Суми до новото бомбардирање поминале помалку од шест часа.
Во еден од погодените делови е оштетена повеќекатна нестанбена зграда, а на околните објекти се искршени стотици прозорци. Надлежните служби се на терен и вршат увид, додека се утврдува целосниот обем на штетата.
Во моментот нема официјални информации за евентуални жртви, а властите соопштија дека проверките сè уште се во тек.
Овој напад следува само еден ден по претходните руски напади врз Сумската област, во кои беа повредени седум лица, меѓу нив и четиригодишно дете.
