Специјалниот претставник на претседателот на Руската Федерација за инвестиции и економска соработка со странство и шеф на Рускиот фонд за директни инвестиции, Кирил Дмитриев, изјави дека светот се движи кон, како што рече, најголема енергетска криза во историјата. Тој наведе дека причините се рекордно високите цени на нафтата и глобалните геополитички тензии, додека Европската Унија и Обединетото Кралство, според него, не реагираат соодветно на ситуацијата.
Дмитриев на социјалната мрежа X напиша дека „светот несвесно се движи кон најголемата енергетска криза во историјата“ и ги обвини европските институции дека ја игнорираат сериозноста на состојбата. Тој оцени дека комбинацијата од енергетски шокови и политички одлуки ќе има сериозни последици за европските економии.
Според него, влошувањето на состојбата на глобалниот енергетски пазар е поврзано со конфликтите на Блискиот Исток, вклучително и напнатоста околу испораките преку Ормускиот теснец. Во своите објави тој исто така ги критикуваше европските политики поврзани со климатските и еколошките цели, тврдејќи дека тие го одвлекуваат вниманието од реалните енергетски предизвици.
Во меѓувреме, генералниот директор на Меѓународната агенција за енергија предупреди на можен недостиг на дизел и авионско гориво во Европа, додека претставници од воздухопловната индустрија укажуваат дека можно е откажување на летови доколку се продлабочи кризата со снабдувањето. Овие предупредувања дополнително ги засилуваат загриженостите за стабилноста на енергетскиот пазар во наредниот период.
