Руската Федерална служба за безбедност (ФСБ) покрена обвинение против основачот на Телеграм, Павел Дуров, и распиша меѓународна потерница по него. Според руските власти, тој се товари за овозможување терористички активности преку платформата, пренесува Ројтерс.
ФСБ тврди дека од почетокот на војната во Украина преку Телеграм биле извршени повеќе од 153.000 кривични дела, од кои околу 33.000 биле поврзани со тероризам, екстремизам и саботажи. Според руските медиуми, безбедносните служби спречиле 475 наводно планирани терористички напади, меѓу кои и десетици напади врз училишта.
Руските власти исто така тврдат дека преку Телеграм бил координиран нападот во концертната сала „Крокус Сити Хол“ во март 2024 година, како и дека преку апликацијата биле собирани информации за руски воени функционери и нивните семејства.
Москва наведува дека регулаторот Роскомнадзор испратил повеќе од 150.000 барања за отстранување на незаконска содржина, но, според нив, компанијата не постапила по тие барања.
Во меѓувреме, Кремљ продолжува да го промовира државниот месинџер MAX како алтернатива на Телеграм и WhatsApp. Павел Дуров претходно ги обвини руските власти дека го ограничуваат пристапот до Телеграм со цел корисниците да ги пренасочат кон новата државна апликација.
И покрај тоа, Телеграм и понатаму останува една од главните комуникациски платформи што ја користат и руските и украинските војници на фронтот.
