Суд во Москва донесе одлука во отсуство да одреди истражен притвор за Жана Немцова, ќерката на убиениот руски опозициски политичар Борис Немцов, поради нејзината поврзаност со организација што руските власти ја прогласиле за „непожелна“.
Жана Немцова ја напушти Русија во 2015 година, веднаш по убиството на нејзиниот татко. Таа е коосновач на Фондацијата „Борис Немцов за слобода“, со седиште во Германија, која руските власти во 2024 година ја прогласија за „непожелна организација“ и го забранија нејзиното дејствување во Русија.
По одлуката на судот, Немцова се огласи на Фејсбук.
„Сега сум позната. ‘Непожелната организација’ е Фондацијата Борис Немцов, која ја основав во Германија во 2015 година. Регистрирана е во Бон, каде што денес пристигнав“, напиша таа.
Според руското законодавство, организациите што властите ги сметаат за закана за уставниот поредок или националната безбедност можат да бидат прогласени за „непожелни“. За финансирање на нивните активности е предвидена казна затвор до пет години, додека организирањето на нивната работа може да се казни со затвор до шест години.
Борис Немцов, еден од најпознатите критичари на рускиот претседател Владимир Путин, беше убиен на 27 февруари 2015 година додека минувал преку мост во близина на Кремљ. Во моментот на убиството имал 55 години и работел на извештај за улогата на руската војска во украинската криза.
Во 2017 година, руски суд осуди петмина Чеченци за убиството на Немцов, оценувајќи дека делото било извршено за паричен надомест. Неговите политички соработници, пак, тогаш тврдеа дека лицата кои го нарачале и го организирале убиството никогаш не биле изведени пред правдата.
