Русија разгледува можност за увоз на гориво со цел стабилизирање на домашниот пазар, потврди портпаролот на Кремљ, Дмитриј Песков. Доколку биде реализиран, ова би претставувало редок потег за земјата, која во поголем обем увезуваше енергенси главно во периодот по распадот на Советскиот Сојуз.
Песков изјави дека Москва води разговори со неколку земји за потенцијален увоз на гориво и додаде дека договорите ќе зависат од цените што ќе бидат понудени.
„Доколку се постигнат договори за увоз по прифатливи цени, тие ќе бидат реализирани. Тоа би било дополнителен чекор кон стабилизирање на пазарот и намалување на наглиот раст на побарувачката“, изјави Песков.
Според него, мерките за стабилизација на пазарот ги разгледува владина комисија предводена од вицепремиерот Александар Новак, по состанокот што во неделата го одржал рускиот претседател Владимир Путин.
Портпаролот на Кремљ не сакаше да открие со кои земји Русија преговара за евентуален увоз, наведувајќи дека, поради разбирливи причини, не може да сподели дополнителни детали.
Воедно, Песков не ги коментираше медиумските информации дека на одредени руски рафинерии им било дозволено да произведуваат гориво според пониски стандарди за квалитет.
Според податоците на Обединетите нации, Русија последен пат увезувала значителни количества бензин во текот на 1990-тите години, кога, поради недостиг на домашниот пазар, годишно увезувала повеќе од два милиони тони гориво.
