Русија со предупредување до Европа: Фабриките за оружје за Украина може да бидат воени цели

Фабриките во Европа кои произведуваат оружје за Украина се потенцијални воени цели за Русија, предупреди во средата портпаролката на руското Министерство за надворешни работи, Марија Захарова.

— реклама —

Захарова на прес-конференција изјави дека европските земји се директно вклучени во конфликтот преку воената поддршка за Украина и оцени дека ваквите активности го одложуваат завршувањето на војната.

Нејзината изјава следуваше како одговор на прашање за подготвеноста на Полска на своја територија да изгради фабрика за производство на пресретнувачки ракети за системот „Патриот“, наменети за Украина.

— реклама —

„Фабриките за оружје во европските земји кои произведуваат оружје за Украина се потенцијални воени цели за Русија и не треба да се мисли дека воените фабрики надвор од територијата на Украина кои произведуваат оружје за режимот во Киев ќе бидат безбедни. Секој што мисли така – се лаже“, рече Захарова.

— реклама —

Таа додаде дека европските земји не обезбедуваат само помош за Украина, туку, преку отворањето фабрики за оружје и заеднички вложувања, според неа, стануваат целосно вклучени во конфликтот.

„Европските земји се директно вклучени во украинскиот конфликт. Тие не обезбедуваат само помош. Со отворањето фабрики за оружје и заеднички вложувања, тие се целосно вклучени. А тоа само го одложува решавањето на конфликтот“, изјави Захарова.

НАТО и повеќе европски земји, пак, соопштија дека ќе продолжат со поддршката за Украина и со помошта за спротивставување на руските сили и за соборување на руски беспилотни летала и проектили.