Русија стопира транзит на живинско месо од ЕУ поради фалсификувани ветеринарни сертификати

Русија воведе забрана за транзит на живинско месо и нуспроизводи од Европската Унија преку својата територија, откако открила пратка со, како што тврдат властите, фалсификувани ветеринарни сертификати.

— реклама —

Руската Федерална служба за ветеринарен и фитосанитарен надзор (Росселхознадзор) соопшти дека мерката стапила во сила вчера и има за цел да спречи ширење на заразни болести кај животните и да ги заштити потрошувачите.

Според руските власти, станува збор за нелегален транспорт на нуспроизводи од живинско месо, наводно со потекло од Германија, кои биле превезувани преку Полска. Пратката влегла во Евроазиската економска унија со возило со полски регистарски таблички и со фалсификувани ветеринарни документи, а крајната дестинација била Узбекистан.

— реклама —

Од Росселхознадзор наведуваат дека, врз основа на анализата на нивните информациски системи и одговорот од германската ветеринарна служба, било утврдено дека производот е со непознато потекло.

— реклама —

Руските власти побарале од Узбекистан да го идентификува испраќачот на спорната пратка.

Во соопштението се додава дека производите што биле испратени со валидни документи најдоцна до 5 август ќе можат да транзитираат низ Русија во текот на денешниот ден.

Ограничувањето ќе остане во сила до завршување на истрагата и одржување разговори со Европската комисија за утврдените неправилности.