Централната банка на Русија ја намали прогнозата за економскиот раст во 2026 година и сега очекува стагнација или раст на бруто-домашниот производ до најмногу еден процент. Воедно, банката ја зголеми и проценката за инфлацијата, наведувајќи дека главна причина е поскапувањето на горивата, поврзано со нападите врз руската нафтена инфраструктура.
Според новите проекции, инфлацијата следната година ќе се движи меѓу шест и седум проценти, што е значително над претходната прогноза од 4,5 до 5,5 проценти. Во банката оценуваат дека се зголемиле инфлаторните очекувања кај домаќинствата, компаниите и учесниците на финансиските пазари, што дополнително може да го отежне нејзиното намалување.
Поскапувањето на горивата почнало да се интензивира од средината на мај, а во текот на јуни во повеќе руски региони биле регистрирани и недостиг на гориво. Овие проблеми следуваа по украинските напади врз рафинерии за нафта во Русија, а дел од аналитичарите предупредуваат дека инфлацијата до крајот на годината би можела дополнително да порасне.
Централната банка ја намали и прогнозата за растот на БДП за 2026 година, од претходно очекуваните 0,5 до 1,5 проценти на меѓу нула и еден процент. Намалени се и очекувањата за економската активност во последниот квартал од годината.
Во образложението се наведува дека компаниите очекуваат забавување на побарувачката, а најновите економски показатели укажуваат на привремено намалување на производствените капацитети, што влијаело врз ревизијата на прогнозите.
И покрај очекувањата дека капацитетите за производство на гориво постепено ќе се обновуваат до крајот на годината, Украина продолжува со нападите врз руската енергетска и логистичка инфраструктура. Во најновите напади биле погодени рафинерија во Тјумен, логистички објект во Екатеринбург и складиште за гориво во Ростов на Дон.
