Независните руски медиуми „Медиазона“ и „Медуза“ објавија нова проценка за руските воени загуби во Украина, според која од почетокот на целосната инвазија во февруари 2022 година досега загинале околу 352.000 руски мажи на возраст од 18 до 59 години.
Извештајот е објавен на Денот на победата во Русија и се темели на податоци од рускиот регистар на оставински постапки, како и на база на податоци за загинати руски војници што ја водат „Медиазона“, „Медуза“, рускиот сервис на Би-Би-Си и група волонтери.
Според нивните податоци, досега се потврдени имињата на 217.808 руски војници загинати во војната.
Во новата проценка за првпат се вклучени и војници кои со судска одлука биле прогласени за мртви или исчезнати, во случаи кога нивните тела не биле пронајдени или идентификувани. Медиумите наведуваат дека околу 90.000 од проценетите жртви припаѓаат токму на оваа категорија.
Во извештајот се посочува и дека бројот на судски барања за прогласување на војници за исчезнати или мртви нагло почнал да расте од средината на 2024 година.
Новите бројки се значително пониски од проценките што ги објавува украинската армија. Според Генералштабот на украинските вооружени сили, Русија до 9 мај загубила околу 1,34 милиони војници од почетокот на инвазијата.
Украинската страна тврди и дека Русија изгубила илјадници тенкови, оклопни возила, артилериски системи, авиони, хеликоптери и дронови.
Во текстот се наведува и проценка на американскиот аналитички центар ЦСИС, според која руските загуби се два до два и пол пати поголеми од украинските. Според истиот извештај, Украина од февруари 2022 до декември 2025 година веројатно имала меѓу 500.000 и 600.000 жртви, вклучувајќи загинати и ранети, од кои меѓу 100.000 и 140.000 загинале во борбите.
Русија и натаму нема објавено целосни официјални податоци за своите воени загуби во Украина.
