Руските научници предупредуваат дека сеизмичката активност на полуостровот Камчатка е значително зголемена, откако во изминатата недела биле регистрирани десет земјотреси, од кои осум биле почувствувани и во Петропавловск-Камчатски.
Според камчатскиот огранок на Геофизичкиот институт при Руската академија на науките, нивото на сеизмичност во овој дел од зоната на субдукција во моментов е високо.
Научниците појаснуваат дека зоните на субдукција претставуваат подрачја каде што една тектонска плоча навлегува под друга, процес што е одговорен за создавање на некои од најсилните земјотреси на планетата, како и за формирање на вулкански појаси и океански ровови.
Само една недела претходно, сеизмичката активност во регионот била оценета како умерено зголемена. Еден од посилните потреси, со јачина од 5 степени според Рихтеровата скала, бил регистриран на околу 161 километар од Петропавловск-Камчатски.
Професорот Иван Кулаков од Институтот за наука и технологија „Сколтех“ изјави дека зголемената активност на Камчатка не е поврзана со неодамнешните разорни земјотреси во Венецуела.
„Земјотресите во различни делови на светот не можат механички да влијаат едни на други на такво растојание. Настаните во Венецуела немаат влијание врз сеизмичката состојба на Камчатка или во другите региони на Русија“, посочи Кулаков.
Потсетување: на 30 јули 2025 година, Камчатка беше погодена од силен земјотрес со јачина од 8,8 степени според Рихтеровата скала, најсилен во регионот од 1952 година наваму.
Поради актуелната состојба, на Камчатка е прогласена состојба на висока подготвеност, додека надлежните служби внимателно ја следат понатамошната сеизмичка активност.
