Четири лица, меѓу кои тројца цивили, загинаа во вооружен напад што го извршил руски војник во Севастопол на анектираниот полуостров Крим.
Гувернерот на Севастопол, Михаил Развожаев, соопшти дека војникот најпрво отворил оган врз свои соборци, при што убил еден војник, а потоа нападнал цивили, при што животот го загубиле уште три лица. Напаѓачот е уапсен.
Според властите, меѓу цивилните жртви се двајца мажи на возраст од 71 и 59 години и 64-годишна жена.
Мотивот за нападот засега не е познат. На местото на настанот се ангажирани истражители, форензичари и службите за итна интервенција, кои ги утврдуваат сите околности на случајот.
Развожаев ги повика граѓаните да не шират непроверени информации и да ги следат само официјалните соопштенија.
Крим, кој Русија го анектираше во 2014 година, во последниот период е честа цел на украински напади насочени кон руската воена логистика, додека Москва од полуостровот редовно изведува операции во војната против Украина.
