Рускиот енергетски гигант „Газпром“ соопшти дека во првата половина од 2026 година остварил нето добивка од 78,4 милијарди рубљи, односно околу една милијарда долари. Тоа претставува значителен пресврт во споредба со истиот период лани, кога компанијата работеше со загуба.
Во првите шест месеци од 2025 година „Газпром“ пријави загуба од 10,76 милијарди рубљи, додека годинава приходите пораснале за 2,9 проценти на годишно ниво, а бруто добивката е зголемена за 15 проценти.
И покрај подобрените финансиски резултати, компанијата продолжува да се соочува со последиците од губењето на голем дел од европскиот пазар по руската инвазија врз Украина. Европската Унија постепено ја намалува зависноста од рускиот гас и планира до 2027 година целосно да го прекине неговиот увоз.
Во меѓувреме, Европа во првата половина од годинава увезла рекордни количини течен природен гас од рускиот проект „Јамал ЛНГ“, кој е во сопственост на компанијата „Новатек“, а не на „Газпром“. Според податоците, увозот достигнал 9,89 милиони тони, што е за 18 проценти повеќе во споредба со истиот период минатата година.
Русија паралелно работи на пренасочување на извозот на гас кон азиските пазари. Властите најавија дека се разгледуваат нови долгорочни договори со партнери од Кина, Индија, Тајланд и Филипини, како дел од стратегијата за намалување на зависноста од европските купувачи.
