Рускиот олигарх за свадбата на синот на Трамп: „Не разбирам зошто ми ги врати парите“

Рускиот олигарх кој помогнал во финансирањето на прославата на свадбата на Доналд Трамп Јуниор тврди дека најстариот син на американскиот претседател Доналд Трамп му ги вратил парите.

„Да, ги врати“, изјави денеска Умар Кремлев на прес-конференција на Меѓународната боксерска асоцијација во Истанбул.

„Ги врати парите што ги потрошив за подарок“, порача тој.

Сепак, Кремлев смета дека враќањето на парите не било потребно.

— реклама —

„Искрено кажано, не разбирам зошто одлучи да го направи тоа. Различни луѓе организираат различни настани. Тоа е како јас да ве поканам во мојата куќа на село. Дали би очекувале потоа да ви дадам сметка?“, рече тој, додавајќи дека тоа би било смешно, пренесува АП.

Инаку, Кремлев е претседател на Меѓународната боксерска асоцијација (IBA), а со години е поврзан со врвот на светскиот бокс и со рускиот спорт.

Истражувачкиот портал ProPublica минатиот месец објави дека Кремлев, кој е близок до рускиот претседател Владимир Путин, ги покрил трошоците за свадбата во износ од неколку стотици илјади долари.

Станува збор за свадбата на Доналд Трамп Јуниор и Бетина Андерсон, која се одржа во мај на Бахамите. Парите, меѓу другото, биле искористени за изнајмување на еден од двата приватни острови на кои се одржувала тридневната прослава.

— реклама —

Бетина Трамп подоцна во објава на Инстаграм напиша дека се венчале опкружени исклучиво со семејството.

Таа додаде дека Кремлев е драг пријател кој многу великодушно бил домаќин на две неверојатни вечери по свадбата.

Претседателот Доналд Трамп, кој не присуствувал на свадбата, претходно изјави дека сето тоа е дозволено, но додаде дека парите ќе бидат вратени.

„Тоа е целосно дозволено. Но, колку што разбирам, тој им ги врати парите“, изјави Трамп.

— реклама —

Тој додаде дека тоа е сосема вообичаено и дека и самиот организирал свадбени прослави за многу луѓе.

Кремлев, кого Путин неодамна го одликуваше со Орденот на пријателството, исто така се обиде да го намали значењето на целиот настан.

Тој изјави дека прославата била заеднички настан и дека луѓето сè преувеличиле.

„Зошто не би можеле да бидеме пријатели? Ние сме само пријатели, а нè поврзува љубовта кон спортот“, рече тој.

— реклама —

Случајот привлече внимание во контекст на војната што Русија ја води против Украина по инвазијата во 2022 година.

Доналд Трамп Јуниор и претходно беше во центарот на вниманието поради неговите врски со Русија. За време на претседателската кампања во 2016 година, неговата средба со руска адвокатка во Трамп Тауер беше клучен дел од истрагите за можно руско мешање во изборите.

На средбата требало да се разговара за компромитирачки информации за тогашната противкандидатка на неговиот татко.

Истрагите се занимаваа со прашањето дали изборниот штаб на Трамп соработувал со Русија со цел да влијае врз исходот на изборите во негова корист.