САД и Иран соопштија дека постигнале договор со кој треба да се стави крај на непријателствата меѓу двете земји, а неговото стапување во сила е предвидено за петок, кога во Швајцарија ќе се одржи и формалната церемонија на потпишување.
Иако целосниот текст на договорот сè уште не е објавен, американскиот претседател Доналд Трамп објави дека договорот е финализиран и најави укинување на поморската блокада на иранските пристаништа, како и повторно отворање на Ормутскиот теснец.
„Договорот со Исламската Република Иран сега е завршен. Честитки до сите!“, напиша Трамп на социјалната мрежа Truth Social.
Тој додаде дека го одобрил „слободното отворање на Ормутскиот теснец“ и „итното укинување на поморската блокада на САД“.
„Бродови од светот, запалете ги вашите мотори. Пуштете ја нафтата да тече!“, порача Трамп.
Белата куќа ја оцени објавата како „историски момент за американската дипломатија“, наведувајќи дека договорот претставува крај на децениското непријателство меѓу Вашингтон и Техеран.
Потврда за финализирањето на договорот пристигна и од Техеран. Заменик-министерот за надворешни работи на Иран, Казем Гарибабади, во телефонско интервју за државната телевизија изјави дека договорот е завршен и дека официјалното потпишување ќе се одржи во петок во Швајцарија.
Деталите од договорот засега остануваат непознати, а светската јавност очекува повеќе информации по неговото официјално потпишување.
