САД и Кина се клучни за трговијата со технологија на ЕУ; Европа сепак ја завршува годината со позитивен биланс.

Европската Унија во 2025 година остварила трговски суфицит од 32,4 милијарди евра во размената на високотехнолошки производи со земјите надвор од ЕУ, покажуваат податоците на Евростат.

Вкупната вредност на извозот на високотехнолошки производи достигнала 566,5 милијарди евра, додека увозот изнесувал 534,1 милијарди евра. Со тоа, ЕУ втора година по ред има позитивен трговски биланс во оваа категорија, по четири последователни години со дефицит.

— реклама —

Во однос на 2015 година, увозот на високотехнолошки производи растел просечно по шест отсто годишно и за десет години се зголемил за 239,9 милијарди евра. Извозот растел со просечна годишна стапка од седум отсто, односно бил зголемен за 265,4 милијарди евра.

Раст бележи и производството на високотехнолошка стока во ЕУ. Вредноста на продаденото производство во 2025 година достигнала 532 милијарди евра, во споредба со 287 милијарди евра во 2015 година, што претставува просечен годишен раст од шест отсто.

— реклама —

Кина и САД биле главни извори на високотехнолошкиот увоз во ЕУ. Од Кина биле увезени производи во вредност од 150,4 милијарди евра, што претставува 28 отсто од вкупниот увоз, додека увозот од САД изнесувал 131,4 милијарди евра или 25 отсто. Следувала Швајцарија со 32,6 милијарди евра и удел од шест отсто.

Речиси половина од увозот од Кина го сочинувале електрониката и телекомуникациската опрема, додека компјутерите и канцелариските машини учествувале со 31 отсто. Од САД најмногу се увезувале воздухопловни производи, со удел од 36 отсто, и фармацевтски производи со 33 отсто. Кај увозот од Швајцарија, фармацевтските производи сочинувале 71 отсто.

— реклама —

САД биле најголем извозен пазар за високотехнолошките производи од ЕУ. Извозот таму достигнал 195,1 милијарда евра, односно 34 отсто од вкупниот извоз. На второ место било Обединетото Кралство со 52,5 милијарди евра или девет отсто, а трета Кина со 48,1 милијарда евра и удел од осум отсто.

Фармацевтските производи доминирале во извозот на ЕУ кон САД, со удел од 62 отсто, додека воздухопловните производи учествувале со 12 отсто.

— реклама —

Кај извозот кон Обединетото Кралство, фармацевтските производи учествувале со 23 отсто, воздухопловните производи и електрониката и телекомуникациите со по 19 отсто, а научните инструменти со 13 отсто.

Во извозот кон Кина најголем удел имале електрониката и телекомуникациите со 30 отсто, по што следувале воздухопловните производи со 27 отсто, научните инструменти со 20 отсто и фармацевтските производи со 13 отсто.