САД ја откажаа заедничката фотографија на министрите од Г20 поради присуството на Лавров

САД се откажаа од планираната заедничка фотографија на министрите за надворешни работи на Г20 откако неколку европски претставници одбија да се фотографираат заедно со рускиот министер Сергеј Лавров и се заканија дека ќе ја напуштат сесијата. Одлуката ја донел американскиот државен секретар Марко Рубио, оценувајќи дека таквата фотографија би можела да предизвика непотребно внимание и да ги истакне поделбите меѓу учесниците.

Состанокот на министрите за надворешни работи на Г20 се одржува во Атланта и треба да ги постави темелите за самитот на лидерите на групата, кој во декември ќе се одржи во голф-клубот на американскиот претседател Доналд Трамп во Мајами.

— реклама —

Откажувањето на фотографирањето ја покажа длабочината на несогласувањата во групата за низа меѓународни прашања, меѓу кои војната меѓу Русија и Украина, тензиите околу Иран, американските царини и кинеските активности во Јужнокинеското Море.

Од американската страна посочија дека една од главните теми на разговорите е слободата на пловидба, особено во Ормускиот Теснец, Црвеното и Црното Море, како и во Јужнокинеското Море. Дискусиите треба да ги опфатат и безбедносните предизвици поврзани со Иран, Русија, Украина и Кина.

— реклама —

Присуството на Лавров предизвика реакции уште пред почетокот на состанокот. Неколку земји изразиле загриженост поради поканата за рускиот министер во време кога Москва ги засилува нападите врз Украина. Украина, иако во минатото била поканувана на состаноците на Г20, годинава не добила покана бидејќи американската администрација одлучила да ги вклучи само официјалните членки на групата.

— реклама —

Дополнителни тензии предизвикале и проблемите со добивањето визи за руската делегација, кои биле решени во последен момент. Портпаролката на руското Министерство за надворешни работи, Марија Захарова, изјави дека тоа создало впечаток дека не сите во Вашингтон биле задоволни од учеството на Лавров. Таа најави дека рускиот министер ќе се заложи за брза реформа на глобалните економски институции.

Во меѓувреме, можноста за нова американска воена интервенција во Иран дополнително ги оптоварува разговорите. Според претходни информации на АП, американски претставници предупредиле неколку земји од Блискиот Исток да се подготват за можни нови напади врз Иран по изборите во САД, како и за можноста Техеран да возврати.

Состанокот го следат и политички тензии во самите САД. Поранешниот американски амбасадор во Грузија Ијан Кели оцени дека присуството на Лавров би можело да предизвика проблеми за Трамп во пресрет на изборите за Конгресот, особено поради незадоволството на дел од републиканските законодавци од неговиот пристап кон рускиот претседател Владимир Путин. Според Кели, учеството на Лавров може да ги отежне и напорите на западните членки на Г20 да постигнат заеднички став за војната во Украина.

На состанокот не учествува ниту Јужна Африка, една од основачките членки на Г20 и единствената африканска држава во групата. Нејзиното отсуство доаѓа по повеќе несогласувања со администрацијата на Трамп, чии високи претставници не присуствуваа ниту на состаноците во Јужна Африка минатата година, кога таа претседаваше со групата.