САД ја преземаат истрагата за авионот на „Рајанер“ што имаше инцидент над Македонија

Националниот одбор за безбедност во транспортот на САД (НТСБ) ќе ја предводи истрагата за сериозниот инцидент со авионот на „Рајанер“, кој на летот од Солун кон Меминген мораше да се врати на аеродромот во Солун откако проблемот се случил во воздушниот простор над Македонија.

Од Комитетот за истраги на воздухопловни несреќи и сериозни инциденти (КИНСИВ) информираа дека, согласно Анекс 13 на Меѓународната организација за цивилно воздухопловство (ИКАО), побарале истрагата да биде делегирана на американскиот НТСБ.

— реклама —

„Во истрагата предводена од НТСБ ќе учествуваат и претставници на КИНСИВ“, изјави претседателот на Комитетот, Марјан Прпоски.

— реклама —

Тој посочи дека веднаш по добивањето на информацијата за инцидентот биле известени сите надлежни институции, меѓу кои Француското биро за истраги и анализи за безбедноста на цивилното воздухопловство (БЕА), грчката агенција за истраги на воздухопловни несреќи, НТСБ и ИКАО.

Од НТСБ потврдија дека ќе назначат акредитиран претставник кој ќе ѝ помогне на Македонија во истрагата, нагласувајќи дека, согласно меѓународните протоколи, сите официјални информации за истрагата ќе ги објавува македонската страна.

— реклама —

Инцидентот се случи на летот на „Рајанер“ од Солун кон германскиот Меминген. Од авиокомпанијата соопштија дека авионот безбедно се вратил во Солун откако за време на летот се откачил прозорец покрај едно од седиштата. Еден патник побарал и добил лекарска помош по слетувањето, а останатите патници со заменски авион го продолжиле патувањето.

Во јавноста се појавија различни информации за причината за инцидентот. Додека грчкиот весник „Катимерини“, повикувајќи се на извори од аеродромот во Солун, објави дека при слетувањето се откачил дел од моторот и повредил патник, „Рајанер“ тврди дека проблемот бил откачување на прозорец за време на летот.

Фотографии и видеа објавени на социјалните мрежи покажуваат оштетувања на авионот, а според сведоштва на патници, при инцидентот дошло до нагла декомпресија. Српски државјанин, кој седел до оштетениот прозорец, според изјавата на неговата сопруга, бил задржан во седиштето благодарение на безбедносниот појас и помошта од неа и уште двајца патници. По слетувањето тој бил пренесен во болница.