САД отвораат пат за нови терапии, Трамп нареди забрзано истражување на психоделични лекови

Американскиот претседател Доналд Трамп потпиша извршна уредба со која се забрзува процесот на одобрување и истражување на психоделични супстанци, меѓу кои и ибогаин, како потенцијален третман за посттрауматско стресно нарушување (ПТСН).

„Оваа уредба ќе обезбеди луѓето кои страдаат од тешки симптоми конечно да добијат шанса да си ги вратат животите и да живеат посреќно“, изјави Трамп во Белата куќа, додавајќи дека одлуката значително ќе го забрза пристапот до нови терапии.

— реклама —

На настанот присуствуваа и подкастерот Џо Роган и американскиот воен ветеран Маркус Латрел, кој ја поздрави иницијативата.

— реклама —

„Ќе спасите многу животи. Мене ова целосно ми го промени животот“, му порача Латрел на Трамп.

Ибогаинот, супстанца добиена од растение во Западна Африка, во поголеми дози може да предизвика халуцинации и е поврзан со одредени здравствени ризици, вклучително и срцеви компликации. Сепак, дел од ветераните сведочат за позитивни ефекти по третмани во странство.

— реклама —

Уредбата предвидува забрзување на научните истражувања, но не значи автоматска легализација или широка клиничка примена на овие супстанци.

Интересот за вакви терапии расте, особено кај ветерани кои се соочуваат со тешки форми на депресија и анксиозност. Според податоците на американското Министерство за ветерани, во 2023 година дури 6.398 ветерани извршиле самоубиство.

Трамп посочи дека првичните резултати кај некои пациенти покажале значително намалување на симптомите, нагласувајќи дека доколку се потврдат ефектите, тоа би можело да има големо влијание врз третманот на менталните нарушувања.