САД разгледуваат воена придружба на танкери низ Ормускиот Теснец, за да ги стабилизира цените на енергенсите

Администрацијата на американскиот претседател Доналд Трамп разгледува можност за обезбедување воена заштита на танкерите со нафта и гас кои минуваат низ Ормускиот Теснец, во обид да ги стабилизира цените на енергенсите кои нагло пораснаа по иранските закани за напади врз бродови во овој стратешки поморски коридор.

— реклама —

Според информации од извори запознаени со разговорите, станува збор за „воена поддршка за снабдување со нафта и гас“, а во опциите што се разгледуваат е и придружба од страна на американската морнарица.

— реклама —

Загриженоста во Вашингтон расте поради можноста енергетските пазари да се соочат со дополнителен притисок доколку воената кампања се интензивира и прошири. Ормускиот Теснец е клучен за извозот на природен гас и сурова нафта, особено од Катар и Саудиска Арабија, а преку него минува околу 20 проценти од светската нафта.

Цената на американската нафта порасна за речиси 10 долари по барел од крајот на минатата недела, а порастот веќе се одразува и врз цените на горивата. Администрацијата, според медиумските извештаи, разгледува и можност федералната влада да гарантира осигурување за танкерите, со оглед дека поморските осигурителни компании ги зголемуваат премиите или го повлекуваат покритието за пловидба низ теснецот.

— реклама —

Во меѓувреме, американската војска соопшти дека од почетокот на заедничката операција со Израел потопила 11 ирански бродови. Идната мисија, доколку биде одобрена, би се фокусирала повеќе на пресретнување проектили насочени кон цивилниот поморски сообраќај, отколку на директно одвраќање на поморски упади.

— реклама —

Државниот секретар Марко Рубио најави дека администрацијата ќе претстави план за справување со растот на цените на нафтата, но без да открие детали за конкретните мерки.