САД сакаат иранските милијарди да ги пренасочат кон своите сојузници

Американската администрација разгледува можност дел од иранските средства да бидат искористени за обнова и надоместување на штетите што, според Вашингтон, биле предизвикани од иранските напади врз американските сојузници во Персискиот Залив.

Според извор запознаен со случајот, американскиот министер за финансии Скот Бесент побарал проценка на штетите што Иран досега ги предизвикал во земјите партнери на САД во регионот. Воедно се разгледува и можноста иранските средства да се користат за покривање на евентуални идни штети.

Оваа информација доаѓа само еден ден откако Мохсен Резаи, советник на иранскиот врховен лидер, за Си-Ен-Ен изјави дека мировен договор за завршување на тримесечниот конфликт зависи од ослободувањето на 24 милијарди долари ирански средства што се замрзнати од САД.

— реклама —

Изворот не прецизира за кои конкретни средства станува збор, но според Ројтерс, Вашингтон не размислува само за официјално замрзнатите ирански средства.

Во меѓувреме, кревкото примирје меѓу САД и Иран повторно е ставено на тест по новите воени активности во регионот.

Американските сили извршиле напади врз ирански радарски позиции во Ормускиот Теснец, откако претходно биле соборени ирански дронови за кои Вашингтон тврди дека претставувале закана за поморскиот сообраќај.

— реклама —

Американската војска подоцна соопшти дека биле пресретнати уште две ирански беспилотни летала.

Како одговор, Иранската револуционерна гарда објави дека нападнала американски бази во Кувајт и Бахреин. Кувајтските власти соопштија дека седум балистички ракети прелетале над населени подрачја, при што е предизвикана материјална штета, но нема жртви.

— реклама —

Во Бахреин беа активирани сирените за тревога, а населението беше повикано да побара засолниште.

Иран подоцна соопшти дека успешно погодил американски цели во двете земји, додека американската страна тврди дека шест ракети биле пресретнати, а седмата не ја достигнала целта.

Паралелно со воените тензии продолжуваат и индиректните преговори меѓу Вашингтон и Техеран за привремен договор што би довел до прекин на конфликтот. Иран бара пристап до своите замрзнати приходи од нафта, олеснување на санкциите и укинување на ограничувањата за извоз на сурова нафта.

— реклама —

Американскиот претседател Доналд Трамп изјави дека најголемиот дел од иранските капацитети за производство на дронови и ракети биле уништени, но додаде дека Иран сè уште располага со околу една петтина од својот ракетен арсенал во споредба со почетокот на конфликтот.

„Имаат уште ракети и дронови. Тоа е значителна количина, но не е како на почетокот на војната“, изјави Трамп.

Конфликтот веќе предизвика раст на цените на нафтата и нарушувања во глобалните синџири на снабдување, додека меѓународните напори за постигнување трајно примирје продолжуваат.