Самит во Тиват: ЕУ и Западен Балкан разговараат за проширувањето, безбедноста и Планот за раст

Тиват денеска е домаќин на Самитот ЕУ – Западен Балкан, кој се одржува под мотото „Заеднички просперитет и стабилност на Европската Унија и Западен Балкан“, а во фокусот на разговорите ќе биде процесот на проширување на Европската Унија.

— реклама —

Со Самитот ќе претседава претседателот на Европскиот совет, Антонио Кошта, додека домаќин е претседателот на Црна Гора, Јаков Милатовиќ. На средбата ќе присуствуваат и Урсула фон дер Лајен, Каја Калас и Роберта Мецола.

— реклама —

Според најавите, лидерите на земјите од Западен Балкан и Европската Унија ќе разговараат за процесот на проширување и спроведувањето на Планот за раст, при што се очекува Брисел уште еднаш да ја потврди својата поддршка за европската перспектива на регионот.

— реклама —

На агендата ќе се најдат и теми поврзани со заедничките безбедносни предизвици, зајакнувањето на отпорноста во услови на сложени геополитички околности, како и продлабочувањето на соработката во надворешната, безбедносната и одбранбената политика.

Самитот претставува дел од спроведувањето на Стратешката агенда на Европскиот совет за периодот 2024–2029 година. Средбите ЕУ – Западен Балкан се одржуваат од 2018 година, а последниот ваков самит се одржа минатата година во Брисел.