СДСМ преку соопштение ги отфрли најновите анкети објавени од ВМРО-ДПМНЕ, оценувајќи ги како нарачани и обвинувајќи дека владејачката партија се обидува со „лажни бројки“ да го прикрие, како што велат, падот на поддршката кај граѓаните.
Од опозициската партија посочуваат дека слична практика имале и унгарскиот премиер Виктор Орбан и поранешниот македонски премиер Никола Груевски, потсетувајќи дека „резултатот на крајот бил ист“.
„Кога нема резултати, се фалат со лажни бројки. Ист принцип, исто школо“, велат од СДСМ, додавајќи дека премиерот Христијан Мицкоски ги презема политичките тактики на српскиот претседател Александар Вучиќ.
Според СДСМ, Владата нема што да понуди кога станува збор за реформите и европската интеграција, па затоа, како што наведуваат, најголем дел од својата енергија ја насочува кон напади врз опозицијата.
Партијата тврди дека ВМРО-ДПМНЕ бележи пад на рејтингот и дека граѓаните веќе не веруваат во, како што велат, „лажните ветувања и пропагандата“.
Од СДСМ повторија дека внесувањето на малцинствата во Уставот е европска, а не бугарска обврска, нагласувајќи дека Македонија преговара со Европската Унија, а не со Бугарија.
„Реформи нема. Единствениот реформски закон што се обидоа да го протуркаат – Законот за Судскиот совет, Европа го врати на доработка“, велат од СДСМ, додавајќи дека без независно правосудство и вистински реформи нема напредок кон ЕУ.
„Доста е со лажни бројки и лажни реформи. Реформи сега. Европа сега“, порачуваат од опозициската партија.
