Во текот на изминатото деноноќие, заклучно со 07:30 часот на 5 јули, на територијата на државата биле евидентирани вкупно 17 пожари на отворен простор, соопшти Центарот за управување со кризи (ЦУК).
Според последните информации, само еден пожар останува под контрола, додека останатите 16 се целосно изгаснати.
Под контрола е пожарот во Општина Македонски Брод, во атарот на селото Белица, каде што беа зафатени борова шума и ниска вегетација.
Во меѓувреме, целосно се изгаснати пожарите во Кучково (Ѓорче Петров), Црквино (Велес), Црвени Брегови (Неготино), Стојаково (Богданци), Добрејци (Струмица), Босилово, помеѓу селата Чанаклија и Ѓечерлија (Василево), кај манастирот „Св. Јоаким Осоговски“ (Крива Паланка), Царевиќ (Прилеп), Нов Караорман (Карбинци), населбата Баби до месноста Мирјанина Црква (Штип), Смојмирово (Берово), Љуботенски Пат (Бутел), улицата „11 Ноември“ (Куманово), Милетино (Брвеница) и Воѓани (Кривогаштани).
Од ЦУК информираат дека надлежните служби и понатаму ја следат состојбата на терен и остануваат подготвени за брза интервенција доколку се појават нови пожари.
