ВМРО-ДПМНЕ преку соопштение обвини дека СДСМ и лидерот на партијата, Венко Филипче, остануваат единствени на политичката сцена кои јавно ги поддржуваат уставните измени поврзани со внесувањето на Бугарите во Уставот без претходно обезбедени гаранции.
Од владејачката партија велат дека СДСМ и во минатото носела одлуки кои, според нив, биле спротивни на волјата на граѓаните, а сега повторно се залага за решенија кои не ја уживаат поддршката од мнозинството.
„Филипче и СДС со месеци се додворуваа на Бугарија и на претседателот Румен Радев, испраќајќи пораки дека би ги прифатиле уставните измени без гаранции. Со тоа покажуваат дека за нив најважно е враќањето на власт, дури и по цена на нови национални отстапки“, наведуваат од ВМРО-ДПМНЕ.
Партијата тврди дека над 80 проценти од граѓаните не ги поддржуваат барањата за уставни измени под сегашните услови и дека јавноста испраќа јасна порака дека европската интеграција треба да продолжи, но без загрозување на националниот идентитет и достоинство.
„Граѓаните сакаат Македонија да стане дел од Европската Унија, но не по секоја цена. Потребен е достоинствен евроинтегративен пат, со зачувување на македонскиот идентитет и интегритет“, порачуваат од ВМРО-ДПМНЕ.
Од партијата додаваат дека Македонија заслужува европска иднина заснована на почитување на националните интереси, а не, како што велат, нови отстапки мотивирани од теснопартиски цели.
