ВМРО-ДПМНЕ преку соопштение соопшти дека лидерот на СДСМ, Венко Филипче, „како специјален бугарски пратеник и пиун на Румен Радев“ верува дека уставните измени се последното барање од Бугарија за продолжување на евроинтегративниот процес.
Од партијата обвинија дека СДСМ и Филипче, „за власт, моќ и амнестија на криминалите“, би прифатиле уставни измени со кои Бугарите би биле внесени во Уставот, иако, според нив, тоа не е последното барање од источниот сосед.
Во соопштението се наведува дека следни теми за отстапки би биле македонскиот јазик, култура, историја и идентитет, а како аргумент повторно се посочува говор на Радев од 2019 година на конференција во Русија, на која присуствувал и Владимир Путин.
Според ВМРО-ДПМНЕ, тогашниот бугарски претседател зборувал за македонската историја во бугарски контекст и изјавил дека Гоце Делчев е Бугарин, како и дека писменоста кај словенските народи дошла од Бугарија.
Од партијата посочуваат дека тогашната власт предводена од Зоран Заев и министерот Филипче не реагирале на тие изјави.
Во реакцијата се споменуваат и имињата на Јане Сандански, Питу Гули, Даме Груев, како и Кирил и Методиј, при што ВМРО-ДПМНЕ тврди дека СДСМ би дозволиле нивно претставување во бугарски контекст.
Во соопштението се споменуваат и Стево Пендаровски и Рубин Земон.
Од ВМРО-ДПМНЕ порачаа дека „времето на национални и идентитетски отстапки заврши“ и дека нема да дозволат прифаќање на, како што велат, „ултиматуми и уцени на штета на македонските идентитетски обележја“.
