Компанијата СпејсИкс, во пресрет на планираниот излез на берза, во својата документација јасно наведува дека извршниот директор Илон Маск не може да биде сменет без сопствена согласност.
Според документите за иницијалната јавна понуда, Маск може да биде разрешен од функцијата само со гласање на сопствениците на акции од класа Б – акции кои носат десет гласа по акција и кои тој ќе ги контролира.
Ова практично значи дека одлуката за негова смена зависи исклучиво од него, бидејќи преку оваа структура ја задржува доминантната гласачка моќ во компанијата.
Во документацијата се наведува дека доколку Маск задржи значителен дел од акциите од класа Б, ќе може да продолжи да ја контролира и структурата на управниот одбор.
Експертите за корпоративно управување оценуваат дека ваквата поставеност му дава право на вето врз секој обид за негова смена – нешто што, според нив, излегува надвор од вообичаените практики.
„Таква одредба не е вообичаена. Одлуката за смена на извршен директор обично е во рацете на управниот одбор“, изјави Лусијан Бебчук, професор на Правниот факултет на Харвард.
СпејсИкс воедно предупредува дека оваа структура ќе ја ограничи можноста на идните инвеститори да влијаат врз клучните одлуки во компанијата.
Компанијата планира да воведе двокласен систем на акции – обични акции од класа А за јавноста и акции од класа Б со повеќекратно право на глас за внатрешните акционери.
Со тоа, контролата врз управувањето ќе остане концентрирана кај основачот, што претставува значајна разлика во однос на компанијата Тесла, која има еднокласен систем на акции.
СпејсИкс, следејќи го примерот на Тесла, е регистрирана во Тексас, по правните предизвици со кои Маск се соочи во Делавер.
