Илон Маск стана првиот светски билионер, но според анализата на CNN, неговиот пат до огромното богатство не бил изграден само на иновации и приватни инвестиции, туку и на значајна поддршка од американската држава.
Компаниите Tesla и SpaceX добиле клучна финансиска помош токму во периодите кога нивната иднина била неизвесна. Според инвеститорот Рос Гербер, еден од раните вложувачи во Tesla, без владината помош овие компании веројатно немало да преживеат.
„Да не беше владата, немаше да постојат ниту Tesla ниту SpaceX“, изјавил Гербер.
SpaceX во раните години добил повеќе од 500 милиони долари грантови од американската влада. Пресуден бил договорот со NASA од 2006 година вреден 278 милиони долари за развој на ракетниот систем Falcon и вселенската капсула Dragon.
Подоцна, во 2008 година, кога компанијата се соочувала со сериозни финансиски проблеми, NASA ѝ доделила договор вреден 1,6 милијарди долари за транспорт на товар до Меѓународната вселенска станица.
И самиот Маск во 2012 година призна дека SpaceX не би стигнал до денешната позиција без поддршката од американската вселенска агенција.
Tesla, пак, во 2010 година добила заем од 465 милиони долари со ниска каматна стапка од американското Министерство за енергетика. Со тие средства бил развиен моделот Model S, кој подоцна станал првиот голем комерцијален успех на компанијата.
Дополнително, купувачите на Tesla користеле федерални даночни олеснувања од 7.500 долари за електрични возила, а според проценките тие олеснувања достигнале вредност од околу 3,4 милијарди долари.
Еден од најголемите извори на приходи за Tesla биле и таканаречените „еколошки кредити“. Поради строгите регулативи за емисија на штетни гасови, традиционалните производители на автомобили купувале кредити од Tesla, бидејќи нејзините возила се целосно електрични.
Само од продажба на овие кредити компанијата заработила повеќе од 14 милијарди долари низ годините.
Маск во 2020 година призна дека Tesla во 2019 година била блиску до банкрот, а дури во 2021 година компанијата успеала да оствари профит без да се потпира на приходите од еколошките кредити.
Денес богатството на Маск главно се темели на вредноста на Tesla и SpaceX, но анализата посочува дека клучната финансиска поддршка во најтешките моменти дошла токму од американските даночни обврзници и владините програми.
„Добро е што овие компании постојат и мислам дека државната помош се исплатеше. Единствената грешка беше што владата не побара сопственички удел во нив“, оценува инвеститорот Гербер.
