Продолжувањето на изградбата на новиот клинички комплекс во Штип, реконструкцијата на деловите оштетени во неодамнешното невреме и зајакнувањето на медицинскиот кадар беа во фокусот на денешната посета на министерот за здравство, Сашо Клековски, и директорот на Фондот за здравствено осигурување, Златко Перински.
На средбата, на која присуствуваа и градоначалникот на Штип, Иван Јорданов, претставници на Клиничката болница и делегација на Светската банка, се разговараше за следните чекори за довршување на болничкиот комплекс, чија вредност се проценува на околу 109 милиони евра.
Министерот Клековски најави дека во наредните два месеца ќе биде завршена ревизијата на досегашните работи, по што ќе следува објавување на меѓународен тендер за избор на компанија што ќе го реализира проектот до крај. Постапката за избор на изведувач и потпишување на договорот, според проценките, ќе трае уште околу три месеци.
Тој посочи дека досега се реализирани приближно 30 проценти од проектот, при што се завршени најголем дел од градежните работи, а следуваат најкомплексните и финансиски најобемни зафати – оперативниот блок, машинските инсталации и опремувањето со современа медицинска опрема.
Првата фаза од проектот предвидува целосно завршување и опремување на новата болница, додека во втората фаза ќе се реконструираат постојните болнички објекти.
Покрај изградбата на новиот комплекс, приоритет ќе биде и санацијата на покривот на Клиничката болница, кој беше сериозно оштетен во силното невреме, кога ветерот достигна брзина од 134 километри на час.
Заменик-директорката на болницата, Билјана Ефтимова, рече дека првичните проценки покажуваат оти за обновата ќе бидат потребни неколку милиони денари, но конечниот износ ќе биде познат по извештајот од осигурителната компанија и дополнителната процена на штетата.
Клековски истакна дека Министерството за здравство веќе обезбедило средства за оваа намена и дека по утврдувањето на целокупната штета ќе бидат одобрени потребните финансии за што побрзо да се обноват оштетените одделенија и повторно да бидат ставени во функција.
Во однос на недостигот од медицински кадар, министерот најави дека ќе биде обновен повикот за вработување специјалисти, бидејќи дел од претходно пријавените кандидати веќе се вработиле во други здравствени установи.
Тој нагласи дека при распределбата на новите специјалисти предност ќе имаат клиничките центри и општите болници надвор од Скопје, а конечниот број вработувања ќе биде утврден по анализата на потребите на здравствените установи и интересот на специјализантите.
Клиничката болница во Штип претставува регионален здравствен центар за источниот дел од државата и обезбедува услуги за околу 150.000 жители, додека поширокото гравитациско подрачје опфаќа приближно 250.000 граѓани.
